Friday, November 24, 2017

கணபதி இருக்க கவலை எதற்கு .....


ஸ்ரீமுத்து கணபதி, ஆவுடையார் கோவில்.

ஒரே கோயிலில் பல பிள்ளையார் மூர்த்திகள் இருந்தாலும் ஒவ்வொரு மூர்த்தியின் அனுகிரக சக்திகள் முற்றிலும் மாறுபடும் என்பதற்கு ஆவுடையார் கோவில் திருத்தலமும் ஒரு உதாரணம் ஆகும்.

தந்தை வழியிலும் தாய் வழியிலும் மொத்தம் 12 தலை முறையினருக்கு தர்ப்பணம் அளித்தலே சிறபபாகும். ஆனால், இவ்வாறு தங்கள் சந்ததியிலுள்ள மூதாதையர்களின் பெயர்கள் அநேகமாக பலரும் அறிந்திருக்க மாட்டார்கள். அத்தகையோர் தங்கள் வம்சாவழியினரின் பெயர்களை அறிய உதவுபவரே ஸ்ரீமுத்துப் பிள்ளையார் ஆவார். மார்கழி மாதத்தில் பனி முத்துக்கள் மறையும் முன் சேகரித்த அருகம்புல் மாலைகள் இவருக்கு ப்ரீதி.


ஸ்ரீகணேச மூர்த்தி, இடையாற்றுமங்கலம், லால்குடி.

ஸ்ரீகணேச மூர்த்திக்கு வலப்புறம் ஸ்ரீமாங்கல்ய மகரிஷி எழுந்தருளி உள்ள திருத்தலமே இடையாற்று மங்கலமாகும்.
எத்தகைய கொடிய திருமண தோஷங்களையும் தீர்க்கக் கூடியதே இத்தகைய ரிஷி வல சக்திகளாகும். வலஞ்சுழி விநாயகரைப் போல இவ்வாறு ரிஷிகள் பிள்ளையாரின் வலப் புறத்தில் எழுந்தருளி இருப்பதையே ரிஷி வல மாங்கல்ய சக்திகள் என்று சித்தர்கள் புகழ்ந்து கூறுகிறார்கள்.
ஒரே ரக மாங்கனிகளால் இத்தல விநாயகருக்கு மாலை அணிவித்து வழிபடுதல் ரிஷி வல சக்திகளைப் பெறும் எளிய முறையாகும்.


பஞ்ச பிள்ளையார் மூரத்திகள், திருப்புனவாசல்

சூன்ய திதி, கூடா நாட்கள், சந்திராஷ்டமம் போன்ற தோஷமுள்ள நாட்களில் திருமணம் புரிந்து கொண்டவர்கள் இத்தல பிள்ளையார் மூர்த்திகளை வணங்கி ஒன்பது கஜ நூல் புடைவைகளையும் ரவிக்கைகளையும் சுமங்கலிகளுக்குத் தானம் அளித்து வந்தால் கணவன் மனைவி பிரிந்து வாழும் சூழ்நிலை ஏற்படாது.


ஸ்ரீ கணபதி மூர்த்தி, திருமணமேடு, லால்குடி. 

திருமணமானபின் தம்பதிகள் தரிசிக்க வேண்டிய திருத்தலங்களுள் ஸ்ரீதர்மவர்த்தினி உடனுறை பஞ்சநதீஸ்வரர் திருத்தலமான திருமணமேடும் ஒன்றாகும். உத்தம குழந்தைகளைப் பெற விரும்பும் பெற்றோர்கள் வழிபட வேண்டிய தலம்.


ஸ்ரீகணபதி மூர்த்தி, அண்டமி திருத்தலம்.

சிலருக்கு சளியுடன் இரத்தம் வெளியேறும் நோய் ஏற்படுவதுண்டு. பல சமயங்களில் இதற்கான காரணங்களை மருத்துவர்களாலும் உறுதியாகச் சொல்ல முடியாது.
இவ்வாறு நோய் நொடிகளால் பாதிக்கப்பட்டவர்கள் அண்டமி கணபதி மூர்த்தியை வணங்கி பூரண கொழுக்கட்டைகளை தானம் அளித்து வந்தால் காரணம் தெரியாத நோய்களிலிருந்து நிவாரணம் கிடடும்.


ஸ்ரீகணேச மூர்த்தி, நகர் சிவத்தலம், லால்குடி.

இப்பூவுலகில் முதல் சந்தனக் காப்பு வளர்பிறை சதுர்த்தி திதியில் இம்மூர்த்திக்கே நிறைவேற்றப்பட்டது. அப்படியானால் இந்த பிள்ளையார் மூர்த்தியின் காலம் கடந்த மகிமையை என்னவென்று சொல்வது ?
எனவே புது முயற்சிகள் வெற்றி பெற வளர்பிறை சதுர்த்தி திதிகளில் தாமே அரைத்த சந்தனக் காப்புடன் இவரை வழிபடுவது நலம்.


ஸ்ரீ கன்னி மூலை கணபதி, ராச்சாண்டார் திருமலை, திருச்சி.

பெண் குழந்தைகள் பருவம் அடையும் முன்பே பல உடல் கூறு சம்பந்தமான பிரச்னைகளை அனுபவிக்க வேண்டிய விதி சிலருக்கு ஏற்படலாம். அத்தகைய வேதனைகள் வாழ்க்கையில் தொடரும்போது இந்த கணபதி மூர்த்தியை வேண்டி கொத்துக் கடலை சுண்டல் ஒரு படி செய்து தானம் அளித்து வந்தால் வாழ்வில் பிடிப்பு ஏற்படும்.


ஸ்ரீகன்னி மூலை கணபதி, பின்னவாசல், லால்குடி.

ஜாதகத்தில் ஒன்பதாம் இடத்தில் பிரகஸ்பதி இருந்தால் அத்தகைய பெண்கள் வீட்டை விட்டு வெளியேறி விடுவார்கள் என்ற ஒரு கருத்து மக்களிடையே நிலவுகிறது. இதற்கு பின்னால் ஜோதிட விளக்கங்கள் உண்டு.
ஆனால், அவற்றைப் பற்றி ஆராய்ச்சி செய்வதை விட ஒன்பதாம் இடத்தில் குரு ஜாதக அம்சம் உள்ள பெண்கள் பின்னவாசல் கன்னி மூலை கணபதியை வணங்கி பஞ்சு திரி தீபங்கள் குறைந்தது ஒன்பது ஏற்றி வழிபடுவதால் நலமடைவர்.


ஸ்ரீகன்னி மூலை கணபதி, திருவாசி.

வாக்கு, பேச்சு சம்பந்தமான குறைபாடுகளைக் களைவதே திருவாசி திருத்தலமாகும். திக்கு வாய்க் குழந்தைகளுக்கு, பேச்சு சரிவராத குழந்தைகளுக்கு ஏற்பட்டுள்ள குறைபாடுகளைக் களைய இங்குள்ள பேச்சி அம்மனுக்கு இளநீர் அபிஷேகம் நிறைவேற்றி வருதல் நலம். தாமே அரைத்த மஞ்சள் பொடியால் கன்னி மூலை கணபதிக்கு அபிஷேகம் இயற்றி சாமந்திப் பூ மாலை அணிவித்து வியாழக் கிழமைகளில் வழிபட்டு வந்தால் உடலில் தோல் நோய்களின் காரணத்தால் தடைபட்ட திருமணங்கள் நிறைவேறும்.
கரடி சித்தர் தினமும் இங்குள்ள அன்னமாம் பொய்கையில் நீராடி பாலாம்பிகையைத் தொழுது பெண்களுக்கு வரும் நோய்கள் நிவாரணம் பெறுவதற்காக பிரார்த்தித்து வருகிறார் என்று சித்தர்கள் அருளியுள்ளார்கள். பாக்கியம் உள்ளவர்களுக்கு கரடி சித்தரின் தரிசனம் ஏதாவது உருவில் கிட்டும்.


ஸ்ரீவிநாயக மூர்த்தி, திருத்தியமலை சிவத்தலம். 

பொதுவாக நாக பிரதிஷ்டையுடன் விளங்கும் கணபதி மூர்த்தியை வழிபடுவதால் நுண்ணிய அறிவு விருத்தியாகும். ஜாதகங்களில் ஐந்தாம் இடங்கள் பாவிகளின் சம்பந்தம் பெறும்போது புத்தி சரவர வேலை செய்யாது. இத்தகையோர் இக்கணபதி மூர்த்தியை வணங்கி பழங்கள், பழச்சாறுகளை தானம் அளித்தல் நலம். செயற்கை பழரசங்களைத் தவிர்க்கவும்.


ஸ்ரீபிரளயம்காத்த விநாயகர், திருப்புறம்பியம் சிவத்தலம், கும்பகோணம்.

ஒவ்வொரு யுக முடிவில்தான் பிரளயம் ஏற்படும் என்று சொல்வதற்கில்லை. தனிப்பட்ட ஒருவருடைய சொந்த பந்தங்கள், உடமைகள் அவரை விட்டுப் பிரியும் நிலை ஏற்பட்டால் அதுவும் ஒருவகையில் பிரளயம்தானே.
எனவே மனதால் உடலால் தாங்க முடியாத வேதனையை எதிர்கொள்ளும்போது இம்மூர்த்தியை வணங்கி ஏழைகளுக்கு தேனில் ஊறிய அத்திப் பழங்களை தானம் அளித்து வந்தால் எத்தகைய உடல் மன வேதனைகளையும் எதிர்கொள்ளும் மனோ திடம் வந்தமையும்.


ஸ்ரீவிநாயகர் வீரசிங்கம்பேட்டை தஞ்சாவூர் மாவட்டம்.

ஒவ்வொரு பிறந்த நாள் அன்றும் ஔவையார் அருளிய “சீதக் களப ... “ என்று தொடங்கும் விநாயக துதியை ஓதி ஹோமம் வளர்த்து வந்தால்தான் உடல் ஆரோக்யமாகத் திகழ்வதுடன் எதிர்வரும் துன்பங்களிலிருந்து தங்களைக் காத்துக்கொள்ளலாம்.
பலரும் மறந்து விட்ட இத்தகைய ஹோம வழிபாட்டை இயற்றிய பலன்களை அளிக்கக் கூடியவரே ஸ்ரீவைத்தியநாத சுவாமி திருத்தலத்தில் அருள்புரியும் விநாயக மூர்த்தி ஆவார்.
அவரவர் தங்கள் பிறந்த நாள் அன்று இந்த விநாயக மூர்த்திக்கு 108 நீர்க் கொழுக்கட்டைகளைப் படைத்து தானம் அளித்தலால் அற்புத பலன்களைப் பெறலாம்.


ஸ்ரீசெல்வவிநாயகர், திருவரங்குளம் சிவத்தலம், புதுக்கோட்டை.

திருவரங்குள தெப்பக்குள கரையில் அமர்ந்து அருள்புரியும் அண்ணலே செல்வ விநாயகர் ஆவார். சுத்தமான பஞ்சில் மஞ்சள் தோய்த்து ஒன்பது மாலைகளை இந்த விநாயக மூர்த்திக்கு அணிவித்து வணங்கி வந்தால் எத்தகைய செவ்வாய் தோஷங்களையும் நிவர்த்தி செய்து மண வாழ்க்கையில ஏறப்டும் சச்சரவுகளை தீர்த்து வைப்பார்.
பல குடும்பங்களில் பெண்கள் தங்கள் கணவன்மார்களை பல ஆயுதங்களாலும் வார்த்தைகளாலும் தாக்கி துன்பங்களை ஏற்படுத்துவதுண்டு. கணவன்மார்களால் வெளியில் சொல்ல முடியாத இத்தகைய பிரச்னைகளுக்கு சுமுகமான முறையில் தீர்வு அளிப்பவரே இந்தக் கருணை மூர்த்தி.


சிவலிங்க மூர்த்தியுடன் அருள் புரியும் அபூர்வமான பிள்ளையார் மூர்த்தி, திருவரங்குளம் சிவத்தலம், புதுக்கோட்டை. 

இவ்வாறு தந்தையும் தனயனும் சேர்ந்து அருள்பாலிக்கும் சிவத்தலங்கள் ஞானத் திருத்தலங்களாக சித்தர்களால் போற்றப்படுகின்றன. 
ஞாயிற்றுக் கிழமைகளில் இத்தலத்தில் அடிபிரதட்சிணம் வந்து குங்குமப்பூ கலந்த பசும் பாலை தானமாக அளித்து வந்தால் உயர் கல்வி பயிலும் மாணவர்கள் உன்னத நிலை அடைவர். ஆளுமை திறன் பெருகும்.


ஸ்ரீகணேச மூர்த்தி, செட்டிக்குளம் சிவாலயம்.

பொதுவாக, ஜாதகங்களில் லக்னங்களில் ராகு, கேது மூர்த்திகள் எழுந்தருளி இருந்தால் அத்தகையோர் தங்கள் வாழ்க்கையில் பல இன்னல்களைச் சந்திக்க வேண்டியிருக்கும்.
சதுர்த்தி, சதுர்த்தசி திதி நாட்களில் இம்மூர்த்தியை வணங்கி 108 பூரண கொழுக்கட்டைகளைப் படைத்து தானமளித்தலால் துன்பங்களிலிருந்து நிவாரணம் பெறுவார்கள்.
இவ்வித துன்பங்கள் மக்களைச் சேரா வண்ணம் காக்க நம் குருமங்கள கந்தர்வா நீல வேணு கந்தம் என்ற அற்புத சூட்சும சக்கரத்தை இத்திருத்தலத்தில் பிரதிஷ்டை செய்துள்ளார்கள்.




ஸ்ரீகணபதி மூர்த்தி, ஆச்சாள்புரம்.

ஸ்ரீகாகபுஜண்ட மகரிஷி தன் பத்தினி நற்பவி தேவியுடன் வழிபட்டு உன்னத நிலைகளை அடைந்த திருத்தலம். செவ்வாய்க் கிழமைகளில் இத்தலத்தில் நற்பவி தேவியை தியானிப்பதும் இல்லங்களில் குடும்ப அங்கத்தினர்கள் அனைவரும் ஒன்று சேர்ந்து ஒருவர் கையை ஒருவர் கோர்த்துக் கொண்டு “நற்பவி, நற்பவி“ என்று 108 முறைக்குக் குறையாமல் ஓதி வருதலால் எத்தகைய கொடிய நோய்களும் விலகும். குடும்ப ஒற்றுமை ஓங்கும். குழந்தைகள் ஒழுக்கத்துடன் திகழ்வர்.




ஸ்ரீகணபதி மூர்த்தி, ஆச்சாள்புரம்.

காமதேனுவின் புதல்வி பட்டி, பட்டியின் புதல்வி ஆச்சா. காமதேனு, பட்டி, ஆச்சா என்ற மூன்று கோமாதா தேவிகளும் ஒருங்கே தரிசனம் செய்த தலமே சீர்காழி அருகே உள்ள ஆச்சாள்புரம் திருத்தலமாகும். இவ்வாறு மூன்று தலைமுறைகளைச் சேர்ந்த பசு கன்றுகளுடன் இத்திருக்கோயிலை வலம் வந்து கோபூசை நிறைவேற்றி வழிபடுவதால் தலைமுறை தலைமுறையாக வாட்டும் பித்ரு தோஷங்கள் விலகி குடும்பத்தில் செல்வமும் அமைதியும் பெருகும்.




ஸ்ரீநஞ்சுண்ட விநாயகர், காருகுடி.

சுவாதி நட்சத்திர தினங்களில் 108 பசு நெய் தீபங்களை காருகுடி திருத்தலத்தில் ஏற்றி வழிபடுதலால் காவல்துறை, நீதி துறையில் இருப்பவர்கள் நலம் பெறுவார்கள். கண்களை மூடிக் கொண்டு நிற்கும் நீதி தேவதை இத்திருத்தலம் ஒன்றில்தான் கண்களைத் திறந்த நிலையில் அருளாட்சி புரிகிறது என்பது சித்தர்கள் தெரிவிக்கும் தெய்வீக இரகசியம். இதன் பின்னணியில் அமைந்த தெய்வீக பொக்கிஷங்களை தக்க பெரியோர்களை நாடி அறிந்து கொள்ளவும்.

சக்தி ஸ்ரீஅங்காள பரமேஸ்வரி அடிமை குருமங்கள கந்தர்வா சத்குரு ஓம் ஸ்ரீ சர்வ ஸ்ரீ சாக்தப் பரப்ரம்ஹ ஸ்ரீ தேவி பக்தாய‌ ஸ்ரீலஸ்ரீ வேங்கடராம சித்த ஸ்வாமிகளின் ஆன்மிக பொக்கிஷங்களில் இருந்து ஒரு சில துளிகள்


... மிக்க நன்றி: "குழலுறவு தியாகி" வலைத்தளம்

Wednesday, November 22, 2017

அமானுஷ்யம்



நம் மனிதசக்திற்கு அப்பாற்பட்ட மேலான சக்திகளும், புரியாத சக்திகளும், கண்ணுக்குத் தெரியாத எத்தனையோ சூட்சும சக்திகளும் இவ்வுலகில் இருக்கிறது என்பதை ஆத்மார்த்தமாக நம்புபவன் நான்எல்லாவற்றிற்கும் உயிர்சக்தி உண்டு என்பதை அனுபவபூர்வமாக உணர்ந்தவன் நான்

அது இல்லாத, அது பரவியிருக்காத இடம் எதுவுமே இல்லைஅவற்றால் நமக்கு நன்மைகளும் உண்டு, தீமைகளும் உண்டுஅவரவர் கர்மவினையை பொறுத்தது. மனிதர்களுக்கு மட்டும் அல்ல, உயிருள்ள அத்தனை உடம்புகளுக்கும் இது பொருந்தும்.

எனக்கு நினைவுதெரிந்த நாள் முதல் என் வாழ்க்கையில் இதை அனுபவித்தவன் நான்ஏன், இப்பொழதுகூட நான் வசிக்கும் இடத்தில் ஆத்மார்த்தமாக உணர்ந்துகொண்டு இருக்கிறேன்.

சில அனுபவங்களை இங்கே பகிர்ந்துகொள்கிறேன்.

1964 என்று நினைக்கிறன். எனது கஸின் ராஜுவும் நானும் உத்தமர்கோவில் ரயில்வேகேட் பஸ்ஸ்டாண்டில் பஸ் ஏறி சத்திரம் பஸ்ஸ்டாண்டிற்கு போய்க்கொண்டு இருந்தோம். கூட்டம் அதிகமானதால் நாங்க இரண்டு பேரும் டிரைவர் சீட்டுக்கு பக்கத்திலே நின்னுண்டு இருக்கோம். டோல்கேட் தாண்டி அய்யம்வாய்க்கால் பிரிட்ஜ்க்கு முன்னாடி காவி வேஷ்டியுடன் தலையிலே சேப்பு துண்டு கட்டிண்டு ஒருத்தர் கையைக்காட்டி பஸ்ஸே நிறுத்தி எங்க ரெண்டுபேரையம் இறக்கச்சொல்லி டிரைவர்கிட்டே சைகை பன்றார். டிரைவர் எங்களை இறக்கிவிட்டார். ராஜுவுக்கு ஒன்னும் புரியலை. ஏன்டா நம்மளை இறக்கிவிட்டார் என்று என்னை கேட்கிறான். நம்ம மருளாளி தான் இறங்க சொன்னார் என்று நான் சொல்ல, நான் யாரையும் பாக்கலை டிரைவர் தான் இறக்கிவிட்டார் என ராஜு சொல்லறான். இல்லை, மருளாளியே நான் பார்த்தேன் என்று நான் சொன்னேன். அவரையே கேட்போம் என்று சொல்லிக்கொண்டு, சுற்றிமுற்றும் பார்க்கிறோம். கண்ணுக்குஎட்டின தூரம்வரை மருளாளியே காணோம். ஆனா நாங்க வந்த பஸ் அய்யம்வாய்க்கால் பிரிட்ஜ்லே மோதி வாய்க்களுக்குள்ளே விழுறதே நாங்க ரெண்டுபேரும் பார்த்தோம். அங்கே ஓடி பார்த்தபோது டிரைவரும் முன்னாடி இருந்தவாளும் நசுங்கிப்போய்ட்டா. வீட்டுக்குப்போய் இதை சொன்னா, பாட்டிக்கும் அத்தைகளுக்கும் ஒரே ஆச்சர்யம். ஏன்னா, மருளாளி இப்ப இல்லையாம். மருளாளி என் அப்பாவோட நண்பர். இதை என்னேன்னு சொல்றது


1978. கண்ணன் நகர் ஜாகை. கிண்டி ஸ்பிக் ஆஃபிஸில் இருந்து இரவு 10 மணிக்கு கிளம்பி, மின்சார ரயில் பிடித்து பழவந்தாங்கல் ஸ்டேஷனிலே இறங்கி நடந்து போயிண்டுஇருக்கேன். லட்சுமி நகர் தாண்டினா ஒரு வீடும் கிடையாது. ரோடு லைட் கிடையாது. பொட்டவெளி. ரெண்டு வருஷமா இப்படித்தான் போறேன். ஒத்தையடி பாதைதான். கிட்டத்தட்ட கண்ணன் நகர் வந்துட்டேன். திடீர்னு பின்னாடி யாரோ கூப்பிடறமாதிரி ஒரு உணர்வு. திரும்பி
பாத்தா ஒரு பெண் நின்றுகொண்டுருக்கிறாள். சைகை காட்டி கீழே ஏதோ விழுந்து கிடப்பதை எடுக்க சொல்கிறாள். அன்று பௌர்ணமிக்கு மறுநாள் என்பதால் நல்ல வெளிச்சம். என் கண்ணுக்கு ஒன்றும் தெரியாதலால் அவளை நோக்கி செல்கிறேன். கண்சிமிட்டும் நேரத்தில் எங்க ரெண்டு பேருக்கும் நடுவே ஒரு வயதான அம்மா நிற்கிறாள். என்னை போகச்சொல்லி கையை ஆட்டுகிறாள். எனக்கு ஒன்றும் புரியாமல் நான் நடக்க ஆரம்பித்தேன். இந்தப்பாதை ஓரிடத்தில் வளைந்து செல்லும். அந்தஇடத்தில் நின்றுகொண்டு இவர்கள் ரெண்டு பேரும் என்ன செய்கிறார்கள் என்று பார்க்கிறேன். யாரையுமே காணோம். ஏதோ ப்ரமையோ என்று நினைத்துக்கொண்டு வீட்டுக்கு போய்விட்டேன். மறுநாள் காலை தாயாரிடம் சொன்னபோது, அவள் சிரித்துக்கொண்டே எல்லாம் நல்லதுக்குதான் சொல்லிட்டு இனிமே யாரவது இதுமாதிரி கூப்பிட்டா திரும்பி பாக்காம போயிண்டே இரு என்று அறிவுறுத்தினாள்.


1992. ஸ்பிக் நகர் வாசி. ஆபீஸ் கூட்டாளிகள் பணினிரெண்டு பேர் ஒன்றுசேர்ந்து திருச்செந்தூர் நடைபயணம் செய்ய செந்திலாண்டவனை பிராத்தனை செய்துகொண்டு ஒருநாள் இரவு எட்டு மணிக்கு நடக்க ஆரம்பித்தோம். ஆறுமுகநேரி வரைக்கும் நடைபயணம் சுமுகமாக போய்க்கொண்டு இருந்ததுஅதற்கப்புறம் என் நடையில் தொய்வு ஏற்பட ஆரம்பித்துவிட்டது. வீரபாண்டிபட்ணம் தாண்டி ரயில்வே கேட் கிராஸ் பண்ணி வாகனங்கள் செல்லாத தெருவிளக்குகள் இல்லாத ஒரு பாதை வழியாக நடந்தோம். கும்மிருட்டு. இரண்டு பக்கமும் பனை மரங்கள், காட்டுபுதர்கள். நடைபயணம் மேற்குள்ளும் பக்தர்கள் அனைவரும் இந்த வழியாகத்தான் போகிறார்கள். சுமார் ஒரு மணி அளவில் சாலையோரம் இருந்த ஒரு அம்மன் கோவிலில் நிறைய பக்தர்கள் ரெஸ்ட் எடுத்துக்கொண்டு இருந்தனர். நானும் கொஞ்சம் ரெஸ்ட் எடுத்துக்கொள்ளலாம் என்று சொன்னதற்கு என்கூட வந்தவர் "வேண்டாம் நம்ம இருவரைத்தவிர பத்துபேர்களும் திருச்செந்தூர் கெஸ்ட் ஹவுஸ் போய் சேர்ந்துவிட்டார்கள்" என்று சொன்னார். நாங்களும் நடந்து கொண்டிருந்தோம். கோவில் தாண்டி சில அடிகள் நடந்ததும், ஒரு பெண்ணும் ஒரு மூதாட்டியும் நின்று கொண்டுருந்தனர். அந்தப்பெண்ணின் கையை மூதாட்டி பிடித்துக்கொண்டிருந்தாள். மூதாட்டி, "பாருங்கள் யாரும் நடக்கவில்லை. அந்த அம்மன்கோவிலில் தங்கி 3 மணிக்கு அப்புறம் நடங்கள்" என்று சொன்னார். அதற்கு அந்தப்பெண், "இல்லை இல்லை அங்கே ஒரு மண்டபம் இருக்கிறது பாருங்கள். அங்கு போங்கள். நல்ல வசதி" என்று கூறினாள். ஆனால் அந்த மூதாட்டி கோவிலுக்கு போங்கள் என்று சொல்லிவிட்டு அந்தப்பெண்ணை இழுத்துக்கொண்டு போய்விட்டார். நாங்கள் இருவரும் அந்தக்கோவிலில் தங்கி ரெஸ்ட் எடுத்துக்கொண்டு 3.30 மணிக்கு நடக்க ஆரம்பித்து 5 மணிக்கு கோவிலை அடைந்தோம். அந்தப்பெண் யார், அந்த மூதாட்டியும் யார் என்று இன்றுவரை ஒன்னும் புலப்படவில்லை. அந்த மூதாட்டி ஏன் எங்களை கோவிலுக்கு விரட்டினார் என்பது புரியாதபுதிராக இருக்கிறது. காரணகாரியங்கள் இல்லாமல் எந்த நிகழ்வும் நடப்பதில்லை.


2006. அலக்நந்தா பூனா. மூணாவது மாடி இல்லம். எப்போதும் வாசகதவு திறந்துதான் இருக்கும். மேல மொட்டைமாடி. யார் ஏறினாலும் இறங்கினாலும் நன்றாக தெரியும். இரண்டாவது மாடியில் வசிக்கும் மராத்திய அன்பர் ராசனே மிக நெருங்கிய நண்பர். அவர் சொன்னார், சிலசமயம் மெட்ராஸி ஸ்டைலே டிரஸ்பண்ணிண்டு ஒரு சின்னவயசு பெண் படியேறி செல்வதை பார்க்கிறேன். உங்க வீட்டுக்கு வராளா இல்லை மொட்டைமாடிக்கு போறாளா தெரியலை. இறங்கிவரத பாத்ததில்லை. நீ கதவை திறந்துகொண்டு உட்காந்திருக்கியே, நீ பாத்துறிக்கியா என கேட்டார். நான் இல்லை என்று சொன்னேன். ஒருநாள் மத்தியானம் ரெண்டுமணி இருக்கும். பாவாடை தாவணி போட்டுண்டு ஒரு பெண் என் வாசகதவை ஒட்டியுள்ள மாடிப்படி வழியாக மொட்டைமாடிக்கு செல்வதை பார்த்தேன். எழுந்து போவதற்குள் ஏழுஎட்டு படி ஏறிவிட்டாள். நீ யார், ஏன் மேலே போகிறாய் என்று கேட்டதற்கு திரும்பிப்பார்க்காமேலேய நா யாரா இருந்தா உனுக்குஎன்ன பக்கத்து ப்ளாக்லே ஒருத்தன் தூக்குல தொங்கினானே அவன் கீழ்வீட்டு அங்கிள் மேல் கோபமா இருக்கான். நீயும் கொஞ்சம் ஜாக்கிரதையா இரு. முடிஞ்சா இந்த வீட்டை வித்துட்டு உங்கஊருக்கு போய்டு. இல்லை கொஞ்ச வருஷம் இங்கே இருக்காதேன்னு சொல்லிட்டு அப்படியே மறைஞ்சுட்டா. எனக்கு பயமாய்ப்போய் வீட்டுக்குள்ளேவந்து கதவை சாத்திட்டேன். யார்ட்டையும் சொல்லலே. ரெண்டு மாஸம் கழித்து, ராசேனேட்ட சொன்னேன். "எனக்கு ஒன்றும் புரியவில்லையே, அந்த ஆளுக்கும் எனக்கும் சம்பந்தமே கிடையாது, அவன் ஆந்திராகாரன், தனியாக இருக்கிறான், குடும்பம் இங்கே இல்லை. ஒண்ணேஒன்னு, அவன் தூக்கில் தொங்கிய பெட்ரூம் ஜன்னலும் என் பெட்ரூம் ஜன்னலும் எதிரெதிரே. அந்தப்பெண் பற்றி விஜாரிக்கிறேன்" என்று சொன்னார். கிட்டத்தட்ட ஒரு வருஷம் ஆன பிறகு ஒருநாள் சொன்னார், "விஜாரித்ததில் இந்த அபார்ட்மெண்ட் காம்ப்லெஸ் கட்டும்போது ஒரு பெண் கூலியாள் மேலேர்ந்து தவறிவிழுந்து மரணம் அடைந்துவிட்டாள். உடலை பக்கத்தில் எங்கேயோ அடக்கம் செய்துவிட்டார்கள் என்று தெரிகிறது." 2008ல் சென்னை வந்துவிட்டேன். 2014ல் இதை விற்று பெங்களூரில் அபார்ட்மெண்ட் வாங்கிவிட்டேன். இப்பொழது இங்குதான் வசிக்கிறேன். 2015ல் ராசேனே மகள் போன்பண்ணி, திடீரென்று மாரடைப்பால் அப்பா காலமாகிவிட்டார் என்று சொன்னாள். எதையும் எதையும் முடிச்சு போடுவது என்று எனக்கு என்றளவும் புரியவில்லை.


2017. நடந்துகொண்டிருக்கும் வருஷம். இப்பொழது வசிக்கும் பெங்களூரு அபார்ட்மெண்டிலும் ஒரு நிகழ்வு சப்தம் இல்லாமல் நடந்து கொண்டுருக்கிறது. ஒருநாள் இரண்டுநாள் இல்லை, பத்துநாள் ஆராய்ந்தேன். ஒரு மண்ணும் புலப்படமாட்டேங்கறது. இன்றளவும் இது வாரத்திற்கு இரண்டு அல்லது மூன்று தடவை நடந்துகொண்டுதான் இருக்கிறது. வளர்பிறை சப்தமி நாள் சில ரகசிய சமிக்ஞைகள் அறிய சிறந்த நாள் என்பதை பழங்கால ஓலைச்சுவடிகள் சொல்வதைப் படித்திருக்கிறேன். என் சிறிய அறிவுக்கு ஏதாவது எட்டுகிறதா என்று பார்ப்போம்.


நிறைய மயிர்கூச்செறியும் சம்பவங்களை அனுபவித்துயிருக்கிறேன். எல்லாவற்றையம் எழுத முடியாதுஎழுதவும் கூடாது. அந்த சக்திகளுடன் இருந்து ஒதுங்கி இருப்பதே மிக நல்லது. தெய்வத்தின் கட்டளைப்படிதான் எல்லா சக்திகளும் இயங்குகின்றன

எல்லாம் அவன் செயல். எல்லா சக்திகளும் அவனுள் அடக்கம்.
எல்லாம் சிவசக்தி, எங்கும் சிவசக்தி, எதிலும் சிவசக்தி.